[وحشتيني..
وجيت مشتاق وحوشتيني ..
لا جاي صياد ولا فارس
ولا حتى ملاك حارس
دا انا جايلك مطر بينادي لرحابك
يا إما افضل على سحابك يا تشتيني
وحشتيني ..
وحيرني البعاد والقرب
وأثر فيا عطف الغرب
وخلاني الومك بس في البرواز
واخاصمك بس بينا ازاز!
وتلمس ايدي ضهر الصورة
تلمس شعرك المتغطي بالطرحة
يموت انا قلبي م الفرحة
ورغم ان الحنين جارف
يوقفني العتاب في عنيكي
انزل ايدي عن شعرك واقول آسف
وقلبي يقول كلام من شوقه لعنيكي
يكفيكي .. ما يكفيني !
واقول إيه بس وانتي وحشتي
في ضحكتك كلمة وحشتيني
وحشتيني..
وحبك جوة قلبي يزيد وعمره ما قل
وليه قلبك وطن ثاير يعاني لدى المحتل
تعالى اتسرسبي في دمي
وقلبي النونو جاي بجنونه شيلي وكبّري وسمّي
ولو مرة تخليني احسك زي ورداية
عبيرها عدى سور القصر غنا وفاح
هرتبلك في قلبي سرير
وهعملك ضلوعي الواح
ولو بعدك عشان ظنك فمتظنيش
يا عصفورة بزقزقتك فتحتي في قلبي شباكه
ومن بعدك قفلت الشيش
مفيش غيرك.... وما أرضاش اشوف غيرك
بحبك حتى وانتي بعيدة مش دارية
بحبك وانتي جنبي ودمعتك جارية
بحبك حتى لو تشكيني لو تنسيني
أحبك حتى لو بايعاني مش شارية!
يا اغلى م السفر بالزاد
اموت لو مرة حبك قل
واموووت لومرة حبك زاد
يا تاعبة القلب بالترحال ..
بلاش يبقى الكلام دايما ..
سؤال ع الصحة والاحوال
انا كويس
مادمتي معايا
انا كويس
ومركب قلبي ماشية بخير
مادمتي المينا والريس
ياريت ترضي مركب قلبي تلمس شط
وقلبي مهما اتشال ومهما اتحط
هيرجع تاني يندهلك
دا انا وطنك ,, وانا اهلك
لا جاي صياد ولا فارس
ولا حتى ملاك حارس
دا انا جايلك مطر بينادي لرحابك
يإما أفضل على سحابك
يإما افضل على سحابك
بلاش يا عمري تشتيني
بلاش ياعمري تشتيني